Það verður algjör hokkíveisla í Skautahöllinni okkar í kvöld 🏒 SA stúlkur hefja leik og spilar opnunarleikinn sinn á heimavelli í Hertz-deild kvenna gegn toppliði Fjölnis kl. 16:45 og strákarnir spila svo gegn Fjölni í Hertz-deild karla kl 19:30. 👌 Forsala miða er hafin í Stubb - 1000 kr. og frítt fyrir 16 ára og yngri. Samlokur og drykkir í sjoppunni 😋

Kvennalið SA spilar sína fyrstu leiki á tímabilinu á heimavelli um helgina þegar liðið fær Fjölni í heimsókn í Skautahöllina á Akureyri og spila tvíhöfða á laugardag og sunnudag. SA hefur aðeins leikið tvo leiki á tímabilinu til þessa en hefur unnið báða leikina og spilað vel en SA bætti við sig þremur nýjum leikmönnum fyrir tímabilið og breiddin í liðinu er mikil. Fjölnir er á toppi deildarinnar með 19 stig en liðið hefur spilað 7 leiki og aðeins tapað einum. Fyrri leikurinn hefst kl. 16:45 á laugardag og sá síðari kl. 11 á sunnudag. Miðaverð er 1000 kr. og frítt inn fyrir 16 ára og yngri. Forsala miða er hafin í miðasöluappinu Stubb. Fyllum stúkuna og styðjum okkar lið til sigurs!

Greiðsluseðlar félagsgjalda eru nú komnir í heimabanka félagsmanna og þeirra sem eru tengdir félaginu á einn eða annan hátt. Félagsgjaldið er kr. 3.500 kr. en við vonumst til þess að þú kæri félagsmaður greiðir félagsgjaldið sem birtist í heimabanka þínum og leggir okkur lið við uppbyggingu félagsins. Ef þú ert ekki félagsmaður í dag en vilt fá greiðsluseðilinn þarft þú aðeins að senda póst á skautahollin@sasport.is og sækja um aðild og þá færð þú sendan greiðsluseðil í heimabankann þinn.

Í gær var alþjóðlegur dagur sjálboðaliðins og af því tilefni hefur Mennta- og barnamálaráðuneytið ýtt úr vör átaki hvar vakin er athygli á framlagi sjálfboðaliða hjá íþrótta- og félagasamtökum. Átakið heitir því viðeigandi nafni - Alveg sjálfsagt!

Skautafélag Akureyrar fékk ein gullverðlaun og ein silfurverðlaun á Íslandsmótinu í listskautum sem fram fór í Egilshöll 19. og 20. nóvember. Sædís Heba Guðmundsdóttir tryggði sér Íslandsmeistaratitilinn í Advanced Novice með 66.64 stig en hún fékk 21.63 stig í stutta og 45.01 stig í frjálsa. Í Junior flokki náði Freydís Jóna Bergsveinsdóttir silfurverðlaunum á sínu fyrsta tímabili í flokknum með sínum besta árangri til þessa þar sem hún fékk 96.98 stig en hún fékk 35.06 stig í stutta og 61.92 stig í frjálsa.

SA Víkingar unnu 4-0 sigur á Fjölni í leik helgarinnar í Hertz-deild karla og léku glimrandi vel á löngum köflum. Það tók 34 mínútur fyrir Víkinga að brjóta á aftur sterkan varnarmúr Fjölnis en eftir það brustu varnir og mörkin komu á færibandi þar sem Unnar Rúnarsson skoraði 2 mörk, Andri Már Mikaelsson og Heiðar Jóhannsson sitthvort markið. SA Víkingar skutu 48 skotum á mark á móti 20 skotum Fjölnis og Jakob Jóhannsson hélt markinu hreinu hjá Víkingum. SA Víkingar styrktu stöðu sína á toppi deildarinnar enn frekar og mæta næst Skautafélagi Reykjavíkur í Laugardalnum 2. desember.

SA Víkingar taka á móti Fjölni í Hertz-deild karla á laugardag í Skautahöllinni á Akureyri. SA Víkingar eru eftstir í deildinni með 15 stig og Fjölnir er í þriðja sæti deildarinnar með 4 stig. Leikurinn hefst kl. 16:45 á laugardag en miðaverð er 1000 kr. og frítt inn fyrir 16 ára og yngri. Forsala miða er hafin í miðasöluappinu Stubb.

Magnaður sigur hjá strákunum í Grafarvogi í kvöld á vel spilandi Fjölnisliði en Fjölnir var með eins marks forystu þegar 7 mínútur lifðu leiks en fyrirliðinn Andri Mikaelsson jafnaði leikinn á 56 mínútu og Heiðar Jóhannsson skoraði svo sigurmarkið mínútur síðar. SA Víkingar voru með 37 skot á mark í leiknum gegn 27 skotum Fjölnis og Róbert Steingrímsson var með 85,2% markvörslu í marki Víkinga.

Íslenska U18 landslið kvenna í íshokkí tekur þátt í 4 Nations móti í Poznan í Póllandi nú yfir helgina. Mótið er alþjóðlegt æfingamót en auk Íslands eru þáttökuþjóðir Spánn, Bretland og Póland og er þetta í þriðja sinn sem liðið tekur þátt í þessu sterka móti. Ísland mætir heimaliðinu Póllandi í dag en leikurinn hefst kl. 15.00 á íslenskum tíma en öllum leikjunum verður streymt í gegnum facebook síðu Poznan hockey. Við eigum 13 fulltrúa í liðinu að þessu sinni sem við fylgjum stolt með og sendum hlýja strauma til liðsins alla leið til Póllands. Áfram Ísland!

Fyrirlesturinn Hið ósýnilega afl verður þann 17. nóvember kl. 17:30 í Háskólanum. Fyrirlesturinn er fyrir íþróttaiðkendur 12 ára og eldri, foreldra, þjálfara, stjórnendur og aðra áhugasama.