Næsta sunnudag 27. maí verður vinnudagur hjá foreldrum hokkídeildar sem eru reiðubúnir í niðurif. Við byrjum á slaginu kl. 16.30 en verkefni er einfalt; strípa gámana sunnan við höllina af innanstoksmunum og losa niður allar viðbætur svo hægt verði að fjarlægja þá á mánudag. Verkið ætti ekki að taka nema skamma stund ef margar hendur vinna verkið og gott væri að koma með borvél með sér ef þið eigið en ekki nauðsynlegt.

Sjónvarpstöðin N4 tók nú á dögunum formanninn og íshokkíkonuna okkar hana Birnu Baldursdóttur í skemmtilegt viðtal undir yfirskriftinni "Hokkíbærinn Akureyri". Sjón er sögu ríkari en innslagið má sjá hér.

Vorsýning Listhlaupadeildar verður heldur betur vegleg í ár en þema sýningarinnar verður Grease í tilefni af 40 ára afmæli kvikmyndarinnar. Sýningin verður föstudaginn 1. júní og hefst kl. 18.00. Veitingar verða til sölu á sýningunni en aðgangseyrir er 1500 kr. fyrir 13 ára og yngri, 1000 kr. fyrir ellilífeyrisþega og 6-12 ára en frítt inn fyrir 5 ára og yngri. Hér er hægt að sjá auglýsingu sýningarinnar á facebook síðu listhlaupadeildar.

Um helgina verðu leikið vinamót heldri manna liða í Skautahöllinni þegar Canadian Moose liðin koma í heimsókn til okkar. OldBoys, Vanir og Valkyrjur taka þátt í mótinu en Moose eru með bæði kvenna og karlalið. Leikirnir hefjast á föstudag en leiknir verða 2 leikir föstudagskvöld, 4 leikir á laugardag og 3 á sunnudag. Hér má sjá dagskrá mótsins.

Boðað er til aðalfundar Skautafélags Akureyrar fimmtudaginn 24. maí kl. 20.00 í fundarherbergi Skautahallarinnar. Venjuleg aðalfundarstörf skv. lögum félagsins.

Aljóðlega krullumótið Ice Cup fer nú fram í Skautahöllinni á Akureyri en setning mótsins fór fram í Norðurslóðasetrinu í gærkvöld og fyrstu leikir hófust í morgun. Yfir 50 erlendir keppendur í 13 liðum frá 6 löndum keppa á mótinu ásamt sjö íslenskum liðum. Það er Krulludeild Skautafélags Akureyrar sem stendur fyrir mótinu og er þetta í fjórtánda sinn sem mótið er haldið en það stækkar með hverju árinu. Mótið hófst klukkan 9 í morgun en því lýkur á laugardag með úrslitaleikjum sem hefjast milli kl. 14 og 15. Dagskrá mótsins má finna hér fyrir neðan en bein útsending er frá mótinu á heimasíðunni okkar. Við hvetjum fólk eindregið til þess að koma líta á keppnina en fyrir utan hörku spennandi keppni og litríka búninga liðanna þá eru veitingarnar sem seldar eru í sjoppunni ekki af verri endanum, íslensk kjötsúpa og fleira á mjög svo hóflegu verði.

Aðalfundur Hokkídeildar Skautafélags Akureyrar verður haldinn fimmtudaginn 17. maí kl. 20,00 í fundarherbergi Skautahallarinnar.

4. flokkur Skautafélags Akureyrar varð Íslandsmeistari í bæði A og B liðum nú um helgina þegar síðasta Íslandsmóti vetrarins var haldið í Egilsthöll. Í keppni A-liða var sigurinn nokkuð öruggur en liðið vann 11 leiki af 12 leikjum á tímabilinu. Glæsilegur árangur hjá góðum liðum. Til hamingju 4. flokkur!

Aðalfundur listhlaupadeildarinnar verður haldinn 15. maí nk. kl. 20.00 í fundarherbergi skautahallarinnar

Met mæting var á byrjendanámskeið Skautafélagsins sem hófst í dag en um 60 börn á aldrinum 4-7 ára mætu á svellið. Námskeiðið hefur verið haldið á þessum tíma árs um nokkurt skeið og gefist vel en þetta er í fyrsta skipti sem íshokkídeild og listhlaupadeild sameinast um að halda námskeiðið saman að vori. Um 30 krakkar voru mættir á ísinn hjá hvorri deild fyrir sig og þjálfararnir áttu í nógu að snúast. Börnin fóru heim með eitt stórt bros eftir að hafa stigið yfir stóra þröskuldinn enda flest að skauta í fyrsta sinn en sum þeirra höfðu beðið þessa dags með óþreyju um langt skeið. Námskeiðið heldur áfram á miðvikudag á sama tíma kl. 16.30-17.15 en námskeiðið telur 8 æfingar og kostar 3000 kr. Það er enþá hægt að skrá börn á námskeiðið í listhlaupi en skráning fer fram hjá Ólöf í netfangið gjaldkeri@listhlaup.is. Það er biðlisti á námskeiðið hjá hokkídeild en skráning á biðlistan má senda á netfangið hockeysmiley@gmail.com