Þrjár stúlkur frá LSA, auk skautara frá SR og Fjölni eru nú staddar í Osló þar sem íslenska landsliðið tekur þátt á Sonja Heine Trophy. Helga Mey (basic Novice) hóf keppni á fimmtudag og náði 17. sæti af 47 keppendum sem er glæsilegur árangur hjá henni. Ylfa Rún (Advanced Novice) hóf keppni í gær með stutta prógrammið og er sem stendur í 21 sæti með 24.38 stig að loknum fyrri keppnisdegi. Ylfa Rún heldur áfram keppni í dag klukkan 19:10 með frjálsa prógrammið. Sædís Heba hefur leik í Junior síðar í dag en upphitun í hennar hóp hefst kl. 10:57 og röðin kemur svo að henni kl. 11:14. Við fylgjumst með þeim úr fjarska og sendum þeim hlýjar kveðjur og ósk um gott gengi.

Við kveðjum deildarkeppnina á laugardag með sannkallaðri hokkíveislu því bæði SA liðinn spila sína síðustu leiki fyrir úrslitakeppnirnar. SA Víkingar eru deildarmeistarar og bikarinn fer á loft! Ársmiðahöfum er boðið í upphitun í ársmiðasalnum hálftíma fyrir leik þar sem verður boðið uppá kaffi og kruðerí. Þjálfari SA ,Sheldon Reasbeck mætir og gefur smá innsýn fyrir leikina. Fyllum stúkuna og styðjum okkar lið til sigurs. SA Víkingar SR Kl 16:45 SA Kvenna SR Kl. 19:30 Hamborgarasalan hefst 30 mín fyrir leik og í leikhléi. Ásgarður sjoppan í Skautahöllinni Opin. Forsala Miða kvenna: https://stubb.is/events/b7919y Forsala Miða karla: https://stubb.is/events/braWqo

U18 drengja landslið Íslands í íshokkí er nú mætt til Mexíkóborgar í Mexíkó þar sem liðið keppir á HM í 3. Deild B á næstu dögum. Liðið leikur æfingaleik við Nýja-Sjáland strax í dag en mótið sjálft hefst svo á sunnudag. SA á 15 fulltrúa í liðinu að þessu sinni og einnig aðila í fararstjórn liðsins. Auk Íslands eru Hong Kong, Mexíkó, Nýja-Sjáland, Ísrael og Tyrkland í riðlinum en Ísland mætir Hong Kong í fyrsta leik mótsins á sunnudag kl. 19:00 á íslenskum tíma. Leikirnir verða væntanlega í beinni útsendingu en við birtum slóðina á Facebook síðu hokkídeildar á fyrsta leikdegi en á mótssíðu alþjóða íshokkísambandsins má fylgjast með tölfræði og dagskrá mótsins.

Um helgina dagana 28. febrúar - 2. mars fer Vormót ÍSS fram hjá okkur hér í Skautahöllinni á Akureyri. Rúmlega 100 keppendur eru skráðir til leiks í ólíkum keppnislínum innan sambandsins en keppt í keppnislínu félaganna og Special Olympics/Adaptive Skating sem og skautahlaupi. Skautasamband Íslands fagnar 30 ára afmæli á þessu ári og verður afmælishátíð ÍSS haldin hátíðleg að keppni lokinni á laugardag. Við hvetjum ykkur öll til að leggja leið ykkar í Skautahöllina og fylgjast með öllum þessum flottu skauturum sína listir sínar ísnum.

Sunna Björgvinsdóttir og lið hennar Södertälje tryggði sér sigur í Sænsku Allsvenskudeildinni norður um helgina með tveimur sigrum á Malmö Redhawks. Södertälje er þá komið í úrslitaeinvígi um sæti í sterkustu íshokkí kvennadeild Evrópu, SDHL, en þar mætir liðið HV71. Sunna átti stórleik í fyrri leiknum gegn Malmö og bar lið sitt á herðum sér þar sem hún skoraði 3 mörk og lagði upp það fjórða í 4-3 sigri og átti einnig góða leik í gær þar sem hún lagði upp fyrsta mark leiksins í 3-0 sigri. Sunna hefur verið einn albesti leikmaður Allsvenskudeildarinnar í vetur og mun mæða mikið á henni í úrslitaeinvíginu gegn HV71 sem endaði í næst neðsta sæti SDHL deildarinnar. Katrín Rós Björnsdóttir og lið hennar í Örebro datt út í undanúrslitum í hinum helmingi Allsvenskudeildarinnar en þar komst Färjerstad í úrslitaeinvígið og mætir Leksand. Fyrstu leikirnir í Playoff till SDHL eins og úrslitaeinvígið er kallað í Svíþjóð er á fimmtudag en þá mætast liðin á heimavelli Södertälje en vinna þarf 2 leiki til að sigra einvígið. Það er hægt að horfa á leikina í gegnum svenskhockey.tv gegn vægu gjaldi.

Uppsetning á leikjum fyrri umferðar

Mánudaginn 17. febrúar hefjast fyrstu leikir á íslandsmótinu.

Sædís Heba Guðmundsdóttir lauk keppni á Vetrarólympíuhátíð Evrópuæskunnar í gær en hún endaði í 22. sæti af 33. keppendum. Sædís fékk 36.58 stig fyrir stutta prógrammið sitt og svo 66.33 í frjálsa prógramminu í gær og 102.91 stig í heildina. Vetrarólympíuhátíð Evrópuæskunnar (Eyof) eru einskonar Ólympíuleikar ungmenna í Evrópu en 45 þjóðir taka þátt í leikunum sem fer fram í Gergíu í fyrsta sinn. Listskautakeppnin var haldin í glænýrri höll í Batumi en þar var einnig keppt í skautahlaupi og íshokkí. Sædís og hópurinn hennar sem kepptu í Batumi ferðast í dag til Bakuriani þar sem lokahátíðin fer fram. Við óskum Sædísi og Jönu þjálfara hennar til hamingju með þennan frábæra árangur. 💐

Það voru þrír heimaleikir SA í Toppdeildunum í Skautahöllinni um helgina en liðin okkar tóku 6 stig úr leikjunum þremur og tryggðu bæði lið sér sæti í úrslitakeppnunum. Meistaraflokkur karla vann Fjölni á laugardag og kvennalið SA vann Fjölni í vítakeppni á laugardag en Fjölnir hafði betur í vítakeppni á sunnudag.

Norðurlandamótið á listskautum sem fer fram í Asker í Noregi hefst í dag en Skautasamband Íslands sendir 4 keppendur til keppni sem allar að keppa í Advanced Novice girls. Við eigum einn keppanda í þessum hópi hana Ylfu Rún Guðmundsdóttir sem er á leið á sitt fyrsta Norðurlandamót. Ásamt Ylfu Rún keppa þær Elín Katla og Arna Dís frá Fjölni og Katla Karítas frá Skautafélagi Reykjavíkur. Ylfa skautar stutta prógramið sitt í dag en Ylfa er fyrst á ísinn í öðrum upphitunarhóp sem hefst kl. 15:25 á íslenskum tíma og hægt er að horfa á streymi af keppninni hér. Ylfa skautar svo frjálsa prógramið á morgun föstudag en mótið klárast svo á laugardag. Við óskum Ylfu og öllum íslenska hópnum velgengni og hlökkum til að fylgjast með ykkur.