Íslandsmótið: Garpar einir á toppinn

Garpar komust einum vinningi fram úr Mammútum eftir leiki gærkvöldsins en liðin eiga nú bæði tvo leiki eiftir. Garpar sigruðu Skytturnar eftir að hafa skorað fjóra í fyrstu umferðinni en á sama tíma töpuðu Mammútar fyrir Víkingum. Fálkar sigruðu Riddara og eru nú einir í þriðja sætinu.

Garpar leika gegn Fífum á miðvikudagskvöldið og síðan gegn Víkingum í lokaumferðinni mánudaginn 28. mars. Mammútar leika gegn Skyttunum á miðvikudagskvöldið og Riddurum í lokaumferðinni. Garpar geta tryggt sér titilinn með því einfaldlega að vinna báða leikina, en Mammútar verða að vinna báða sína og treysta á að Garpar tapi a.m.k. öðrum leiknum til að knýja fram úrslitaleik um titilinn. Önnur lið hafa fyrir nokkru misst af möguleika á titlinum. 

Keppnin um bronsið harðanar hins vegar með hverri umferðinni. Fálkar eru nú einir í þriðja sætinu en eiga aðeins einn leik eftir, gegn Víkingum á miðvikudagskvöldið. Fálkar sitja síðan yfir í lokaumferðinni. Með sigri á Víkingum gætu Fálkar þó farið langleiðina með að tryggja sér bronsið, kæmust þá í sex sigra og aðeins Skytturnar sem gætu náð þeim. Gerist það kemur til kasta árangurs þessara liða í skotum að miðju þar sem þau unnu hvort sinn leikinn sín á milli. Sigri Víkingar Fálka er allt opið og raunar er sá möguleiki fyrir hendi að fjögur lið endi jöfn með fimm vinninga í þriðja sætinu, þ.e. Skytturnar, Víkingar, Riddarar og Fálkar. Komi sú staða upp fengju Fálkar bronsið miðað við úrslit í innbyrðis viðureignum þessara fjögurra liða. Skytturnar og Víkingar gætu þó skotið hinum ref fyrir rass og komist í 6 sigra með því að vinna báða leikina sem eftir eru. Endi aðeins Skytturnar og Víkingar jöfn í þriðja sætinu eru það Skytturnar sem hljóta bronsið þar sem liðið vann báðar viðureignirnar gegn Víkingum. 

Úrslit 13. umferðar:

Garpar - Skytturnar  6-3
Mammútar - Víkingar  2-7
Fálkar - Riddarar  5-3

Hin frestaða 12. umferð fer fram miðvikudagskvöldið 23. mars:

Braut 2: Víkingar - Fálkar
Braut 4: Fífurnar - Garpar
Braut 5: Skytturnar - Mammútar

Ísumsjón: Fálkar, Garpar, Mammútar