Skautafélag Akureyrar | Listskautar

Nýr Zamboni íshefill tekinn í notkun í Skautahöllinni

Thu, 07 May 2026 21:49:00 +0000

Nýr Zamboni íshefill var tekinn í notkun í Skautahöllinni í dag og leysir þar með af hólmi þann gamla sem hefur þjónustað félagið dyggilega í 23 ár. Nýja vélin er sérsmíðuð fyrir félagið í Zamboni verksmiðjunni í Bandaríkjunum og flutt til landsins í gegnum Zamboni Europe í Svíþjóð. Tæknimaður frá fyrirtækinu fylgdi vélinni til landsins, sá um gangsetningu hennar og tryggði að allt væri eins og það ætti að vera áður en hún fór í sína fyrstu ferð á svellinu. Svellagerðarmenn félagsins fengu jafnframt kennslu á vélina og nýjan búnað hennar.

Aðalfundur Skautafélags Akureyrar 14. maí

Wed, 06 May 2026 10:07:00 +0000

Boðað er til aðalfundar Skautafélags Akureyrar fimmtudaginn 14. maí kl. 18.00 í félagssal Skautahallarinnar. Hefðbundin aðalfundarstörf skv. lögum félagsins. Félagsmenn eru hvattir til að mæta en allir skuldlausir félagsmenn 16 ára og eldri hafa atkvæðisrétt, málfrelsi, tillögurétt og kjörgengi til stjórnarstarfa á aðalfundi félagsins.

Aðalfundir íshokkídeildar, listskautadeildar og krulludeildar dagana 11.-13. maí

Mon, 04 May 2026 16:14:00 +0000

Skautafélaga Akureyrar boðar til aðalfunda allra deilda félagsins dagana 11.-13. maí í félagssal Skautahallarinnar. Tímasetningar aðalfunda deilda: Íshokkídeild mánudaginn 11. maí kl. 18:00 Krulludeild þriðjudaginn 12. maí kl. 18:00 Listskautadeild miðvikudaginn 13. maí kl. 18:00

Minningarorð um Birgi Val Ágústsson

Fri, 01 May 2026 13:52:00 +0000

Í dag var borinn til grafar Birgir Valur Ágústsson, heiðursfélagi í Skautafélagi Akureyrar. Biggi Ágústar var alla tíð mikill skautafélagsmaður og sérstakur áhugamaður um íshokkí. Hann var formaður félagsins á árunum 1970 – 1975 og lagði sitt lóð á vogarskálarnar við rekstur félagsins og uppbyggingu þess. Hann kom einnig að uppbyggingu skautasvæðisins að Krókeyri og tók virkan þátt í undirbúningi fyrir vélfrysta skautasvellið sem vígt var í janúar 1988, sem var stórt framfaraskref fyrir félagið. Sem athafnamaður í bænum studdi hann ásamt bræðrum sínum félagið af heilum hug, og þegar keppt var í Reykjavík fékk liðið oftar en ekki lánaða bíla til að komast á leikstað svo eitthvað sé nefnt. Einnig var fluttur inn íshokkíbúnaður og kylfur þegar slíkt var erfitt að komast yfir hér á landi og síðar sett upp verslun með skautabúnaði. Biggi keppti lengi í íshokkí með félaginu og hélt áfram að æfa langt fram eftir aldri, allt fram á sjötugsaldur. Á ísnum var hann kappsamur og það var sérstaklega ánægjulegt að spila með honum síðustu árin. Við minnumst hans á fjær bláu, kallandi á pökkinn með heldur frjálslega túlkun á rangstöðureglum. Enn þann dag í dag er talað um „að taka Bigga Ágústar á þetta“ þegar menn skila sér ekki í vörnina og bíða frammi. Í Bigga áttum við hauk í horni sem fylgdist ætíð vel með gengi félagsins og þegar maður rakst á hann á förnum vegi var íshokkíið alltaf til umræðu. Biggi var gerður að heiðursfélaga Skautafélags Akureyrar á 60 ára afmæli félagsins árið 1997. Að lokum vil ég fyrir hönd Skautafélags Akureyrar þakka fyrir ómetanlegt framlag til félagsins sem og félagsskapinn í ísnum, og sendi eftirlifandi eiginkonu hans, Ingunni Þóru Baldvinsdóttur, börnum þeirra, fjölskyldu og vinum, innilegar samúðarkveðjur.

IceCup 2026 í Skautahöllinni

Thu, 30 Apr 2026 13:43:00 +0000

Alþjóðlega krullumótið IceCup hófst í dag og er haldið í Skautahöllinni í 21. skipti. Yfir 80 keppendur í 20 liðum frá 13 löndum (Þýskaland, Ungverjaland, Tékkland, Sviss, Slóvakía, Skotland, Sealand, Kanada, Holland, Fillippseyjar, England, Bandaríkin og Ísland) taka þátt í mótinu í ár en það er Krulludeild Skautafélags Akureyrar sem á veg og vanda af þessu skemmtilega móti sem laðar að mun fleiri lið en fá þáttökurétt. Opnunarhátið mótsins fór fram í gærkvöld í húsi Flugbjörgunarsveitinnar og hófst keppnin svo í morgun og stendur yfir frá morgni til kvölds næstu daga og klárast svo með úrslitaleikjum á laugardagskvöld og lokahófi. Við hvetjum fólk til þess að koma líta á keppnina en fyrir utan hörku spennandi keppni og litríka búninga liðanna þá er seld kjötsúpa og aðrar veitingar á mjög svo hóflegu verði.

SA liðin unnu Íslandsmeistaratitlana í U14

Tue, 28 Apr 2026 09:00:00 +0000

Skautafélag Akureyrar tryggði sér báða Íslandsmeistaratitlana U14 liða um helgina á síðasta helgarmóti tímabilsins sem fór fram á Akureyri. AAA liðið, SA Víkingar, unnu alla sína leiki um helgina og vann 11 af 12 leikjum sínum á tímabilinu. Spennan var meiri í AA liðum en þar réðust úrslitin í síðustu leikjunum en SA Ynjur/Jötnar unnua alla sína leiki um helgina og tryggðu sér Íslandsmeistaratitilinn. Við óskum SA liðunum innilega til hamingju með frábært tímabil og Íslandsmeistaratitlana.

SA Jötnar Íslandsmeistarar í U18

Thu, 16 Apr 2026 11:14:00 +0000

SA Jötnar tryggðu sér Íslandsmeistaratitilinn í U18 um helgina með 10-2 sigri á Fjölni og 6-4 sigri á SR. Jötnar hafa þar með unnið 9 af 11 leikjum sínum í vetur. SA teflir fram tveimur liðum í U18, en SA Víkingar sitja í öðru sæti með 7 sigra í 11 leikjum. Bæði lið eiga einn leik eftir á tímabilinu, innbyrðis viðureign, en sá leikur dugar Víkingum ekki til að ná toppsætinu. SR og Fjölnir hafa bæði lokið leikjum sínum á tímabilinu.

Kvennalandsliðið hefur leik á HM í Slóveníu

Mon, 13 Apr 2026 12:37:00 +0000

Íslenska kvennalandsliðið í íshokkí hefur leik í dag á Heimsmeistaramótinu í II deild A sem fer fram í Bled í Slóveníu. Ísland mætir heimaliðinu Slóveníu í fyrsta leik kl. 17:30 á íslenskum tíma. Önnur lið í riðlinum eru Póland, Ástralía og Taívan en Norður-Kórea dró sig úr keppni og verða því bara 5 lið í riðlinum. Kvennalið SA á 10 leikmenn í liðinu ásamt fleirum sem spila erlendis og með öðrum félagsliðum. Hægt er að fylgjast með stöðu leikja og tölfræði á heimasíðu alþjóða íshokkísambandsins og leikirnir verða sýndir í beinu streymi á icehockeyiceland.tv.

Íslenska karlalandsliðið hefur leik á HM í Búlgaríu

Sun, 05 Apr 2026 09:57:00 +0000

Íslenska karlalandsliðið í íshokkí hefur leik á Heimsmeistaramótinu í II deild B á morgun í Sofíu í Búlgaríu. Liðið hefur verið við æfingar á staðnum frá því á föstudag og undirbúningur gengið vel. Í gær spilaði Ísland æfingaleik gegn heimamönnum í Búlgaríu og lauk leiknum með öruggum 10–2 sigri íslenska liðsins.

Skautarnir hennar Eddu Indriðadóttur komnir í Skautahöllina

Tue, 31 Mar 2026 08:20:00 +0000

Heiðursfélagi Skautafélags Akureyrar og margfaldur Íslandsmethafi í skautahlaupi afhenti félaginu um helgina skautahlaupsskautana sína sem hún notaði við flest þau afrek sem hún vann til á ferlinum. Skautana afhenti hún félaginu á vormóti ÍSS sem fram fór um helgina og eru þeir nú til sýnis í Skautahöllinni ásamt verðlaunapeningum hennar og keppnisnúmerinu hennar, 13.

SA Jötnar Íslandsmeistarar U22 liða

Mon, 30 Mar 2026 15:47:00 +0000

U22 lið Jötna tryggði sér Íslandsmeistaratitilinn um helgina eftir sigur á Húnum í Egilshöll. Jötnar unnu fyrri leikinn 5–2 í tvíhöfðanum og tryggður sér þar með Íslandsmeistaratitlinn en þetta var sjöundi sigur liðsins á Húnum í vetur.

Leik 3 í úrslitakeppninni frestað til morguns vegna veðurs!

Thu, 26 Mar 2026 10:32:00 +0000

Leikur 3 í úrslitakeppninni í Toppdeild kvenna sem fara átti fram í dag er frestað til morguns vegna veðurs! Leikurinn verður leikinn á föstudag kl. 16:45. Við sjáumst í stúkunni ❤️🤍🖤 Forsöluverð í Stubb 2500 kr fyrir fullorðna. Miðaverð 3000 kr. í hurð. 15 ára og yngri 1000 kr. Ath almenn árskort gilda ekki á úrslitakeppnina Gull- og Silfurkort gilda og halda sínum sætum. 🎟 https://stubb.is/events/b890gn 🍔Hamborgarasalan hefst 30 mín fyrir leik í Miðgarði.

Breyttur leiktími - fyrsti leikur í úrslitum byrjar kl 17:00

Sat, 21 Mar 2026 15:18:00 +0000

Athugið breyttan leiktíma – fyrsti leikur í úrslitum kvenna hefst kl. 17:00 vegna ófyrirsjáanlegra aðstæðna.

Forsala miða hafinn á fyrsta leik í úrslitakeppnina í Toppdeild kvenna

Tue, 17 Mar 2026 11:56:00 +0000

Úrslitakeppni kvenna hefst á laugardag í Skautahöllinni á Akureyri. Miðasala hafinn á #leik 1 í Stubb.

Úrslitakeppnin í Toppdeild kvenna hefst á laugardag

Mon, 16 Mar 2026 11:00:00 +0000

Úrslitakeppnin í Toppdeild kvenna hefst næsta laugardag, 21. mars. Skautafélag Akureyrar unnu deildarmeistaratitilinn og hafa því heimaleikjaréttinn. SA tapaði aðeins einum leik í deildarkeppninni en leikirnir við SR hafa flestir verið jafnir og spennandi svo búast má við hörkuviðureign í úrslitakeppninni. Leikið verður svo til skiptis heima og að heimann þangað til annað liðið nær að vinna þrjá leiki og tryggja sér þannig Íslandsmeistaratitlinn í íshokkí.

Forsala miða á leik #2 hafinn í Stubb

Tue, 10 Mar 2026 17:01:00 +0000

Miðasala á stórleikinn - leik#2 í úrslitakeppninni, fimmtudaginn 12. mars, er hafinn í Stubb.

minningarorð um Sólveigu Huldu

Mon, 09 Mar 2026 07:45:00 +0000

Í dag kveðjum við kæran félaga og eina af okkar bestu, Sólveigu Huldu Valgeirsdóttur. Sólveig Hulda hafði stórt SA-hjarta, eins og við segjum gjarnan um þá sem eru alltaf tilbúnir að leggja félaginu okkar lið. Í rúm tuttugu ár var hún virkur og ómetanlegur þátttakandi í starfi hokkídeildar Skautafélags Akureyrar.

Úrslitakeppnin í Toppdeild karla hefst á þriðjudag í Laugardal

Wed, 04 Mar 2026 08:24:00 +0000

Úrslitakeppnin í Toppdeild karla hefst næsta þriðjudag, 10. mars. Skautafélag Reykjavíkur er deildarmeistari eftir spennandi úrslitaviðureign í Laugardal um síðustu helgi þar sem báðir leikir fóru í framlengingu og SR vann þar í bæði skiptin og tryggðu sér heimaleikjaréttinn í úrslitakeppninni. Leikið verður svo til skiptis heima og að heimann þangað til annað liðið nær að vinna þrjá leiki og tryggja sér þannig Íslandsmeistaratitlinn í íshokkí.

Ísland hársbreidd frá gullinu á U18 HM í Sarajevó

Tue, 24 Feb 2026 13:54:00 +0000

U18 drengjalandslið Íslands vann til silfurverðlauna á Heimsmeistaramótinu í 3. deild B sem fram fór í Sarajevó í Bosníu-Hersegóvínu í liðinni viku. Ísland lék til úrslita á mótinu þar sem liðið mætti sterku liði Taílands en tapaði leiknum naumlega í framlengingu eftir jafnan og spennandi leik.

Fréttir af okkar leikmönnum í Evrópu

Wed, 18 Feb 2026 18:31:00 +0000

Nú þegar fer að líða að hápunkti íshokkítímabilsins í Evrópu ætlum við að flytja fregnir af stöðu leikmanna úr SA sem leika með liðum víðsvegar um álfuna. Úrslitakeppni sænsku NDHL deildarinnar hefst í dag og þar eigum við þrjár leikmenn sem berjast um meistaratitilinn og sæti í SDHL. Einnig eru leikmenn okkar í Hollandi, Þýskalandi og Danmörku að undirbúa sig fyrir úrslitakeppnir á næstu vikum.