Krulla | Skautafélag Akureyrar | Krulla

Nýjar stjórnir teknar til starfa hjá Skautafélagi Akureyrar

Wed, 27 May 2026 14:39:00 +0000

Aðalfundum Skautafélags Akureyrar og deilda félagsins er nú lokið og hafa nýjar stjórnir tekið til starfa fyrir komandi starfsár. Fundirnir endurspegluðu áframhaldandi uppbyggingu og öflugt starf innan félagsins þar sem iðkendum hefur fjölgað, árangur verið góður og mikil áhersla lögð á jákvæða menningu og þróun starfseminnar. Fram undan eru spennandi verkefni, ekki síst undirbúningur að 90 ára afmæli félagsins árið 2027.

Skauta- og íshokkí leikjanámskeið SA í júní

Tue, 19 May 2026 08:51:00 +0000

Í júní býður SA upp á skauta- og íshokkí leikjanámskeið fyrir öll börn fædd 2015–2019. Námskeiðin fer fram dagana 15.–19. og 22.-26. júní.

Nýr Zamboni íshefill tekinn í notkun í Skautahöllinni

Thu, 07 May 2026 21:49:00 +0000

Nýr Zamboni íshefill var tekinn í notkun í Skautahöllinni í dag og leysir þar með af hólmi þann gamla sem hefur þjónustað félagið dyggilega í 23 ár. Nýja vélin er sérsmíðuð fyrir félagið í Zamboni verksmiðjunni í Bandaríkjunum og flutt til landsins í gegnum Zamboni Europe í Svíþjóð. Tæknimaður frá fyrirtækinu fylgdi vélinni til landsins, sá um gangsetningu hennar og tryggði að allt væri eins og það ætti að vera áður en hún fór í sína fyrstu ferð á svellinu. Svellagerðarmenn félagsins fengu jafnframt kennslu á vélina og nýjan búnað hennar.

Aðalfundur Skautafélags Akureyrar 14. maí

Wed, 06 May 2026 10:07:00 +0000

Boðað er til aðalfundar Skautafélags Akureyrar fimmtudaginn 14. maí kl. 18.00 í félagssal Skautahallarinnar. Hefðbundin aðalfundarstörf skv. lögum félagsins. Félagsmenn eru hvattir til að mæta en allir skuldlausir félagsmenn 16 ára og eldri hafa atkvæðisrétt, málfrelsi, tillögurétt og kjörgengi til stjórnarstarfa á aðalfundi félagsins.

Aðalfundir íshokkídeildar, listskautadeildar og krulludeildar dagana 11.-13. maí

Mon, 04 May 2026 16:14:00 +0000

Skautafélaga Akureyrar boðar til aðalfunda allra deilda félagsins dagana 11.-13. maí í félagssal Skautahallarinnar. Tímasetningar aðalfunda deilda: Íshokkídeild mánudaginn 11. maí kl. 18:00 Krulludeild þriðjudaginn 12. maí kl. 18:00 Listskautadeild miðvikudaginn 13. maí kl. 18:00

Minningarorð um Birgi Val Ágústsson

Fri, 01 May 2026 13:52:00 +0000

Í dag var borinn til grafar Birgir Valur Ágústsson, heiðursfélagi í Skautafélagi Akureyrar. Biggi Ágústar var alla tíð mikill skautafélagsmaður og sérstakur áhugamaður um íshokkí. Hann var formaður félagsins á árunum 1970 – 1975 og lagði sitt lóð á vogarskálarnar við rekstur félagsins og uppbyggingu þess. Hann kom einnig að uppbyggingu skautasvæðisins að Krókeyri og tók virkan þátt í undirbúningi fyrir vélfrysta skautasvellið sem vígt var í janúar 1988, sem var stórt framfaraskref fyrir félagið. Sem athafnamaður í bænum studdi hann ásamt bræðrum sínum félagið af heilum hug, og þegar keppt var í Reykjavík fékk liðið oftar en ekki lánaða bíla til að komast á leikstað svo eitthvað sé nefnt. Einnig var fluttur inn íshokkíbúnaður og kylfur þegar slíkt var erfitt að komast yfir hér á landi og síðar sett upp verslun með skautabúnaði. Biggi keppti lengi í íshokkí með félaginu og hélt áfram að æfa langt fram eftir aldri, allt fram á sjötugsaldur. Á ísnum var hann kappsamur og það var sérstaklega ánægjulegt að spila með honum síðustu árin. Við minnumst hans á fjær bláu, kallandi á pökkinn með heldur frjálslega túlkun á rangstöðureglum. Enn þann dag í dag er talað um „að taka Bigga Ágústar á þetta“ þegar menn skila sér ekki í vörnina og bíða frammi. Í Bigga áttum við hauk í horni sem fylgdist ætíð vel með gengi félagsins og þegar maður rakst á hann á förnum vegi var íshokkíið alltaf til umræðu. Biggi var gerður að heiðursfélaga Skautafélags Akureyrar á 60 ára afmæli félagsins árið 1997. Að lokum vil ég fyrir hönd Skautafélags Akureyrar þakka fyrir ómetanlegt framlag til félagsins sem og félagsskapinn í ísnum, og sendi eftirlifandi eiginkonu hans, Ingunni Þóru Baldvinsdóttur, börnum þeirra, fjölskyldu og vinum, innilegar samúðarkveðjur.

IceCup 2026 í Skautahöllinni

Thu, 30 Apr 2026 13:43:00 +0000

Alþjóðlega krullumótið IceCup hófst í dag og er haldið í Skautahöllinni í 21. skipti. Yfir 80 keppendur í 20 liðum frá 13 löndum (Þýskaland, Ungverjaland, Tékkland, Sviss, Slóvakía, Skotland, Sealand, Kanada, Holland, Fillippseyjar, England, Bandaríkin og Ísland) taka þátt í mótinu í ár en það er Krulludeild Skautafélags Akureyrar sem á veg og vanda af þessu skemmtilega móti sem laðar að mun fleiri lið en fá þáttökurétt. Opnunarhátið mótsins fór fram í gærkvöld í húsi Flugbjörgunarsveitinnar og hófst keppnin svo í morgun og stendur yfir frá morgni til kvölds næstu daga og klárast svo með úrslitaleikjum á laugardagskvöld og lokahófi. Við hvetjum fólk til þess að koma líta á keppnina en fyrir utan hörku spennandi keppni og litríka búninga liðanna þá er seld kjötsúpa og aðrar veitingar á mjög svo hóflegu verði.

Skautarnir hennar Eddu Indriðadóttur komnir í Skautahöllina

Tue, 31 Mar 2026 08:20:00 +0000

Heiðursfélagi Skautafélags Akureyrar og margfaldur Íslandsmethafi í skautahlaupi afhenti félaginu um helgina skautahlaupsskautana sína sem hún notaði við flest þau afrek sem hún vann til á ferlinum. Skautana afhenti hún félaginu á vormóti ÍSS sem fram fór um helgina og eru þeir nú til sýnis í Skautahöllinni ásamt verðlaunapeningum hennar og keppnisnúmerinu hennar, 13.

minningarorð um Sólveigu Huldu

Mon, 09 Mar 2026 07:45:00 +0000

Í dag kveðjum við kæran félaga og eina af okkar bestu, Sólveigu Huldu Valgeirsdóttur. Sólveig Hulda hafði stórt SA-hjarta, eins og við segjum gjarnan um þá sem eru alltaf tilbúnir að leggja félaginu okkar lið. Í rúm tuttugu ár var hún virkur og ómetanlegur þátttakandi í starfi hokkídeildar Skautafélags Akureyrar.

Íþróttafólk Akureyrar heiðrað á íþróttahátíð Akureyrar í gærkvöld

Fri, 30 Jan 2026 13:50:00 +0000

Íþróttafólk og íþróttafélög Akureyrar var heiðrað í gær á íþróttahátið Akureyrar sem fram fór í Menningarhúsinu Hofi. Íshokkíkarlinn Unnar Hafberg Rúnarsson var í 4. sæti yfir íþróttakarla Akureyrar. Hlauparinn Baldvin Þór Magnússon frá UFA er íþróttakarl Akureyrar 2025 og knattspyrnukonan Sandra María Jessen frá Þór/KA er íþróttakona Akureyrar 2025.

Sædís Heba Guðmundssdóttir og Unnar Hafberg Rúnarsson hafa verið valin íþróttafólk SA fyrir árið 2025

Tue, 13 Jan 2026 16:49:00 +0000

Listskautakonan Sædís Heba Guðmundssdóttir og íshokkímaðurinn Unnar Hafberg Rúnarsson hafa verið valin íþróttafólk SA fyrir árið 2025 og voru heiðruð og veitt viðurkenningar af Skautafélagi Akureyrar í gærkvöld. Bæði tvö hafa nú þegar verið valin íþróttafólk sinnar deildar innan félagsins en eru einnig skautakona og íshokkíkarl ársins hjá sínum sérsamböndum, Skautasambandi Íslands og Íshokkísambandi Íslands. Bæði tvö eru tilnefnd af Skautafélagi Akureyrar til Íþróttafólks Akureyrar fyrir árið 2025 en valið verður kunngjört á íþróttahátið Akureyrar 29. janúar næstkomandi í menningarhúsinu Hofi.

Jólasýningin á sunnudag

Mon, 08 Dec 2025 10:18:00 +0000

Jólasýning Listskautadeildar Skautafélags Akureyrar - Þegar Trölli stal jólunum fer fram sunnudaginn 14.des nk. kl: 17:30 í Skautahöllinni. Foreldrafélagið verður með veitingasölu í hléinu og pekkjakastið á sínum stað. Láttu ekki þessa frábæru sýningu fram hjá þér fara, sjón er sögu ríkari. Miðasala á staðnum.

Skautafélag Akureyrar fær styrk úr Menningar- og viðurkenningarsjóði KEA

Fri, 05 Dec 2025 08:10:00 +0000

KEA afhenti styrki úr Menningar- og viðurkenningasjóði félagsins síðastliðinn mánudag og fór styrkúthlutunin fram í Menningarhúsinu Hofi á Akureyri. Var þetta í 92. skipti sem veitt er úr sjóðnum. Sjóðurinn var stofnaður árið 1936 en þá hlaut Sjúkrahúsið á Akureyri fyrsta og eina styrk sjóðsins. Að þessu sinni var úthlutað styrkjum að fjárhæð tæplega 30 milljónir króna til fjölbreyttra samfélagsverkefna, íþrótta- og æskulýðsstarfsemi og til ungs efnilegs afreksfólks á félagssvæði KEA. Umsóknir voru fjölmargar og hlutu rúmlega 70 einstaklingar, félög og verkefni styrk úr sjóðnum.

Heilbrigðisteymi SA hlaut hvatningarverðlaun UMFÍ

Fri, 28 Nov 2025 10:18:00 +0000

Jóhann Þór Jónsson tók í gærkvöldi við hvatningarverðlaunum Ungmennafélags Íslands (UMFÍ) fyrir hönd Heilbrigðisteymis Skautafélags Akureyrar á formannafundi ÍBA í gærkvöld. Hvatningarverðlaunin voru fyrst kynnt á Sambandsþingi UMFÍ í Stykkishólmi í október síðastliðnum. Í tilkynningu UMFÍ kom fram að „Framlag heilbrigðisteymis Skautafélags Akureyrar til öryggis og velferðar iðkenda og gesta í Skautahöllinni á Akureyri er ómetanlegt.“

Félagsgjöld Skautafélags Akureyrar eru komin í heimabankann

Tue, 25 Nov 2025 12:45:00 +0000

Greiðsluseðlar félagsgjalda eru nú komnir í heimabanka félagsmanna og þeirra sem eru tengdir félaginu á einn eða annan hátt. Félagsgjaldið er kr. 3.900 kr. en við vonumst til þess að þú kæri félagsmaður greiðir félagsgjaldið sem birtist í heimabanka þínum og leggir okkur lið við uppbyggingu félagsins. Ef þú ert ekki félagsmaður í dag en vilt fá greiðsluseðilinn þarft þú aðeins að senda póst á skautahollin@sasport.is og sækja um aðild og þá færð þú sendan greiðsluseðil í heimabankann þinn. Ef þú hefur ekki áhuga á að vera félagi þá er hægt að eyða henni en hún hverfur sjálfkrafa 1. mars.

Krulluævintýri í Noregi

Thu, 06 Nov 2025 10:22:00 +0000

9 krullarar úr Krulludeild SA hentu sér í ævintýraferð til Noregs til að spila á Bygdøy Broomstacking. Þetta var alveg hrikalega skemmtilegt og var spilað í tveimur krulluhöllum. Í heimahöll Bygdøy sem er með tvær brautir og Snarøya sem er 6 brauta hús. Á næsta ári er 10 ára afmæli þessa skemmtilega krullumóts.

Æfingar SA hefjast samkvæmt tímatöflu í næstu viku

Tue, 19 Aug 2025 17:23:00 +0000

Æfingar hjá Skautafélagi Akureyrar eru nú að fara á fullt samkvæmt tímatöflu og er starfsemi allra deilda að taka við sér eftir sumarið. Byrjendaæfingar hefjast samkvæmt tímatöflu í næstu viku. Byrjendaæfingar: Listhlaup: Hefjast mánudaginn 25. ágúst og verða alla mánudaga og miðvikudaga kl. 16:00–17:30. Upplýsingar og skráning: thjalfari@listhlaup.is Íshokkí: Hefjast þriðjudaginn 26. ágúst og verða alla þriðjudaga og fimmtudaga kl. 17:00–17:45. Upplýsingar og skráning: hockeysmiley@gmail.com Krulla: Hefst í september og verða æfingar auglýstar sérstaklega á heimasíðu krulludeildar. Almenningstímar hefjast í Skautahöllinni fyrstu helgina í september og fyrsta skautadiskó vetrarins verður föstudaginn 1. september. Við hvetjum foreldra, iðkendur og áhugafólk um íþróttirnar til að kynna sér æfingatöflu félagsins og mæta með okkur í skemmtilegt og fjölbreytt ísstarf í vetur.

Ný stjórn kosin og Ingibjörgu Magnúsdóttur veitt gullmerki á aðalfundi Skautafélags Akureyrar

Wed, 21 May 2025 15:18:00 +0000

Aðalfundur Skautafélag Akureyrar fór fram á fimmtudagskvöld í félagssalnum í Skautahöllinni. Á dagskrá voru hefðbundin aðalfundarstörf með skýrslu um starfsemi félagsins, skýrslu um fjárhag, reikninga og fjárhagsáætlun, kosningu stjórnar og önnur mál. Ingibjörgu Magnúsdóttur var veitt gullmerki félagsins fyrir störf sín fyrir félagið síðastliðin 17 ár.

Aðalfundir íshokkídeildar, listskautadeildar og krulludeildar dagana 12.-14. maí

Fri, 02 May 2025 16:56:00 +0000

Skautafélaga Akureyrar boðar til aðalfunda allra deilda félagsins daganna 12.-14. maí í félagssal Skautahallarinnar. Tímasetningar aðalfunda: Krulludeild mánudaginn 12. maí kl. 18:00 Íshokkídeild mánudaginn 12. maí kl. 20:00 Listskautadeild miðvikudaginn 14.m maí kl. 20:00

IceCup2025 mótið hafið

Thu, 01 May 2025 10:35:00 +0000

Krullumótið IceCup 2025 er nú hafið í Skautahöllinni en 25 ár eru liðin frá fyrsta IceCup mótinu. Það eru 24 lið í mótinu í ár þar af 18 erlend lið og keppendur frá 16 mismunandi löndum en uppselt var í mótið með meira en árs fyrirvara. Setning mótsins fór fram í flugsafninu í gærkvöld en leikirnir hófsut svo kl. 9 í morgun og munu standa yfir fram á laugardagskvöld. Það er einnig þétt dagskrá hjá keppendum utan ís með kvöldskemmtunum sem enda svo með veglegu lokahófi á laugardagskvöld. Mótið er í beinni útsendingu hér en leikið er alla þrjá keppnis daganna frá kl. 9 og fram á kvöld. Við hvetjum áhugasama um að koma í stúkuna og fylgajst með keppninni sem er virkilega skemmtileg og spennandi en hægt að gæða sér á dýrindis kjötsúpu og öðrum veitingum á 2. hæðinni.